LEGAZPI CITY- Naghagad nin dispensa sa Pamilya Batocabe an ipigtutukdong “main gunman” sa pagadan ki Ako Bicol Party-list Representative Rodel Batocabe.
Sa paghampang ni Henry Yuson alyas “Romel” sa mga mamamahayag sa Bicol, inako kaining pigsugo sana siya ni incumbent Daraga Mayor Carlwyn Baldo.
Segun ki Yuson, nagtugot siya sa trabaho huli sa suboot promesa ni Baldo na regular na sahod.
Dugang pa kan suspek na komon na nag-oolay sinda Baldo, trusted security aide na si Christopher Cabrera Naval alyas “Tuping” asin sarong Danilo Muella alias Manoy Dan sa suboot na pagpapagadan sa lehislador.
Bilang pinakabagong miyembro asin limang bulan pa sanang naglipat hali sa Visayas, siya suboot an pigsugo na gumibo kan pagadan ki Batocabe asin mismong si Tuping an nagkua saiya na napag-araman na team leader man kaini sa dating trabaho bilang miyembro kan Philippine Army.
Mientras tanto, nagdesisyon suboot ining magsurendir huli ta wara man na naresibe maski pisong bayad sa ginibong krimen makalihis idulag ni Tuping an bayad kan alkalde para saiya.
Marurumduman na kasubanggi sana kan magsurendir si Yuson sa 903rd Infantry Brigade kan Philippine Army na nakabase sa Sorsogon mantang sinirbihan man nin arrest warrant kan Daraga PNP sa pigkakahampang na kasong rape.
Sa presente apat sa anom na persons of interest an kapot ngunyan kan mga otoridad.
