LEGAZPI CITY — Misteryong ipigkokonsidirar sa Barangay Buhatan sa banwaan kan Sto. Domingo, Albay an biglaan na pagkagadan kan nagkapirang residentes sa lugar tuyong nagbuburutwaan an mga sirang kwaw kada bulan kan Marso.
Sa intribista kan Bombo Radyo Legazpi ki Barangay Kagawad Maria Teresa Balmis, kinumpirmar kaini na talagang igwa nin mga nagagadan tuyong nagigin mabaskog na an nasambitan na sira sa lugar.
Sigon ki Balmis, garo lugod nagluluwas na kaipuhan na magdusay nin buhay karibay kan pagkabaskog kan kwaw.
Ginibong halimbawa kan barangay kagawad an pagkagadan kan pitong katawo na saro-sarong binawian nin buhay kada aldaw nin Martes siring man an suboot pagkalamos sa salog kan sarong 3-anyos na aki.
Ineksplikar ni Balmis na an mga insidenteng ini an nagtao saindang ideya na magsagibo nin aktibidad tuyong Marso na pig-aapod ngunyan na Kwaw Festival.
Ini ngani suboot na mapugulan an ano man na trahedya sa paagi na man kan misa asin pagpapasalamat para sa mabaskog na pagkabuhay kan mga residentes sa lugar na naglalaom sa mga sirang nadadakop sa dagat.
Ngunyan na 2017, sa saindang ika-apat na taong pagselebrar kan nasambitan na festival, sinabi ni Balmis na swerteng dae na nin residente sa Barangay Buhatan na binawian nin buhay kasabay kan pagbutwa kan mga kwaw.
