LEGAZPI CITY – Sarong kontrobersiya para sa nagkapira an isyu sa maanomalyang flood control partikulamente na an mga proyektong ipigtugdok sa provincia kan Albay.
Segun ki alyas “Grace” sa intrevista kan Bombo Radyo Legazpi na dapat ayuson asin tawan pansin kan gobierno an mga nangyayaring korapsyon huli ta ginamit digdi iyo an mga pondo kan nacion na pigkukuwa man sa namamanwaan sa paagi kan tax.
Sa hiling niya na nagigibo man kan Sunwest asin Hi Tone Construction an saindang trabaho alagad may mga nagruruluwasan suboot na isyu na an ibang proyekto ninda an bako de-kalidad asin bako kompleto an pagkakagibo.
Magigirumduman kaya na kabale an duwang naunambitang kompanya sa listahan kan 15 contractors na may pinakadakol na flood control projects na ibinulgar ni Presidente Ferdinand Marcos Jr.
Dapat suboot na imbestigaran kun napasain an mga pondo huli ta labing apektado an mga komunidad na harani sa mga pigsasabing flood control projects alagad dae man napapakinabangan sa oras nin kalamidad.
Napansin man kaini na nakakapalala kan korapsyon sa mga nasabing proyekto an huli man sa pagigin protector kan mga nagkapirang politiko para sana makakuwa man nin parte sa ipighabon na mga pondo.
Pagladawan niya man na nabibilang na sana sa kamot an mga matitinong politiko kun kaya mawot niya man na magpili na nin maray an publiko tuyong eleksyon nganing dae na ini mangyari na mga katiwalian.
Suhestyon niya na dapat isa-irarom sa auditing kan Commission on Audit an gabos na mga proyektong ipigtugdok huli ta kadaklan sa mga ini an pigsasagibo na sanang negosyo kan mga contractor asin politiko mantang dapat ayuson an mga raot asin bako an pagraot asin pagpapakarhay kan mga marhay na tinampo.
Nagtutubod man si Grace na puno’t dulo kan korapsyon sa mga flood control projects iyo an kakulangan sa sistema na pigpapa-otob kuta kan Gobierno.
