LEGAZPI CITY- Nilimas kan mga parahabas an haros sarong milyon na kantidad kan ganansya kan JY supermarket sa Brgy. Sagpon, Daraga, Albay na pagasadiri kan bayaw ni Philippine Councilor’s League-Albay Chapter President asin Provincial Board Member Allan Rañola.
Sa nagunong impormasyon kan Bombo Radyo Legazpi, nakuhaan mismo kan naka-install na closed circuit television camera (CCTV) sa establisyemento an paglaog kan tolo hasta sa apat na kalalakihan sa paagi kan pagsakat sa steel grills sa ikaduwang eskalon.
Nagdiretso man an mga ini sa duwang money vault asin pwersahang binuksan an mga ini hasta sa makua an pigkakarkulong nasa labi sa P900, 000 na ganansya sa negosyo.
Mientras tanto, narekober man sa lugar an kurtina, nylon na pisi, lagadi asin mga stick kan botong na pigtutubudang dara kan mga suspek.
Sa suway man na intrevista sa mga residente sa likod kan business establishment, nakadangog an mga ini nin ribok sa itaas kan nasabing lugar alagad ipinasipara sana sa pag-iisip na hale sana ini sa ongoing construction.
Sa presente, padipisilan man an pag-aram sa pagkakabisto kan mga suspek makalihis na maaraman na nag-malfunction an infrared kan CCTV kaya’t malabo an footages.
