LEGAZPI CITY- Maabot sa 3-K na mga parasisira sa banwaan kan San Andres, Catanduanes an naapektaran kan bagyong enteng.
Segun ki John Tolentino, Operations and Warning Chief kan MDRRMO San Andres, dae pa pigtutugutan na maglawod an mga parasisira huli sa makusog na ukol kan dagat sa lugar.
Sa ngunyan, nagpapadagos an distribusyon nin mga foodpacks sa mga barangay, partikularmente sa mga coastal areas na naapektaran kan raot nin panahon.
Nagpasalamat naman si Tolentino huli ta nagsusunod an mga parasisira sa mga abiso na pigtatao kan Coast Guard asin naibitaran an mga dae pinaglalaomang insidente.
Napag-araman na igwa nin nairehistrong nawawarang parasisira sa banwaan kan nakalihis na Septyembre 1 alagad ligtas man na nakabalik sa saindang pamilya kasuudma.
Abiso na sana liwat kan opisyal sa publiko na maging alerto sa panahon kan kalamidad tanganing makaibitar sa anumang mga peligro.
