LEGAZPI CITY – Ipigtalaan ngunyan na Hulyo an pagsasagibo nin road safety trainings asin seminar para sa mga tricycle driver sa ciudad kan Legazpi.
Segun ki Land Transportation Office Bicol Director Francisco Ranches Jr. sa intrevista kan Bombo Radyo Legazpi na Bicol wide an pigigibong mga seminars alagad personal na naghagad nin request an ciudad.
Napag-araman kaya na saro man liwat sa mga mangengenot na mga kaso sa tinampo iyo an reckless imprudence.
Tinawan duon kan opisyal na kinakaipuhan na masabutan kan gabos na mga drivers asin motorista an importansya kan seguridad sa tinampo.
Sinabi ni Ranches na downtrend na an mga aksidente sa tinampo sa nagkapirang parte kan rehiyon alagad dae nagpapaka kampante an ahensya kaya padagos na nagi-edukar sa mga drivers.
Nanindugan ini na bako sana an Land Transportation Office an igwang responsibilidad sa kaligtasan sa tinampo kundi an gabos na mga namamanwaan.
Pagbuyagyag kaini na target na paglaog kan taong 2030 na mapababa nin 50% an mga road crash kaya padagos an esfuersos na pigigibo kan mga enforcers.
