LEGAZPI CITY – Padagos na pigbabantayan kan state weather bureau an nabilog na panibagong Low Pressure Area na nanotaran sa luwas kan Philippine Area of Responsibility.
Segun ki PAGASA Southern Luzon Weather Forecaster Ariel Zamudio sa intrevista kan Bombo Radyo Legazpi na may katamtamang tyansa na mabilog bilang bagyo an nasabing raot nin panahon asin posibleng maka-apektar sa northern luzon.
Pwedisir man magdara nin pag-uuran an trough o extension kan LPA sa Bicol Region, Visayas, asin eastern part kan Central Luzon sa masunod na semana.
Pagdoon niya man na susog sa mga inisyal na forecast track an dae ninda nahihiling na baybayon kan raot nin panahon an rehiyon Bicol alagad dae ninda pighahale an posibilidad na magbago ini sa mga masunod na aldaw.
Pigtaram pa kan nasabing Weather Forecaster na magigin malinaw an magigin direksyon kan naunambitang LPA pati man an saindang forecast sa oras na magrani na ini sa kadagaan.
Mientrastanto dae pa man suboot nalulusaw an saro mang raot nin panahon na si bagyong Huaning asin padagos ining naghihiro parayo sa Pilipinas.
Pagirumdom ni Zamudio sa publiko na permihang mag-antabay sa saindang mga weather advisory urog nang may posibilidad na maka-apektar an LPA sa rehiyon Bicol asin sa iba pang parte kan nacion.
