LEGAZPI CITY- Dae na nagibong magnigar kan sarong 61-anyos na lola makalihis na madakop kan closed circuit television (CCTV) camera sa aktong nagsa-shoplift sa sarong mall sa Brgy. Bagumbayan, Ligao City.
Base sa nakuang CCTV footage na iprinesentar sa mga otoridad, naglaog sa nasambitan na mall si Edna Prelejera asin nagdiretso sa mga stock nin pampaputing sabon asin conditioner.
Makalihis makua an kinakaipuhan na items, ibinugtak ini kan lola sa toong bulsa kan sulot na shorts en vez na darahon sa cashier ngani na bayadan.
Aktong pahali na ini sa mall kan pugulan kan customer relation assistant asin CCTV operator asin dinara sa istasyon kan Ligao City Police.
Napag-araman na nagkakantidad man sana nin P98.00 an mga nakuang items kan nasambitan na lola.
Mientrastanto, isinairarom man ini sa eksaminasyong medikal antes na darahon sa istasyon ngani na pagsirbehan an reglementary period of detention.
