LEGAZPI CITY- Gadan an sarong 20-anyos na lineman makalihis na makuryente sa Brgy. Sta. Cruz, Palanas, Masbate.
Sa intrevista kan Bombo Radyo Legazpi kay PSSG Lloyd Lipon, an Duty Investigator kan Palanas Municipal Police Station, sinabi kaini na mantang nagkakabit nin internet cable an biktima sa lugar, aksidenteng nasabit sa linya nin kuryente na nagresulta kan pagkakakuryente asin pagkahulog sa poste.
Tulos man na naghagad nin tabang an mga katrabaho kaini asin pigrespondehan kan mga kapulisan.
Napag-araman na residente kan Pilar, Sorsogon an nasabing biktima asin haloy nang lineman sa probinsya kan Masbate.
Dinara pa man kuta sa pinaka araning ospital an biktima alagad idineklarar na dead on arrival kan doktor.
Mientrastanto, nagpatanid man si Lipon sa publiko na magdoble ingat lalo na kun an mga trabaho an harani sa linya kan kable kan mga kuryente.
