LEGAZPI CITY – Ipinagirumdom kan Department of Agriculture (DA) an paggamit kan early warning system kan mga lokal na gobierno urog na sa panahon kan tag-uran asin ‘typhoon season’.
Inomaw ni Agriculture Secretary William Dar an LGUs na mahigot an pagsunod kan sampulong aldaw na pagtataong-abiso sa mga paraoma antes pa man an paglaog kan posibleng raot kan panahon tangarig na makapaghanda.
Sa paghahapot kan Bombo Radyo Legazpi ki Dar, magayon na development suboot an epektibong disaster management tangarig na maprotehiran an buhay, produkto asin mga ataman na hayop kan mga residente urog na sa Bicol na tipikal na agihan kan mga bagyo.
Mas marhay man suboot na itanom kan mga paraoma an vegetable crops na kayang maka-survive sa anumang penomena sa nasyon.
Dugang pa ni Dar na pinag-aadalan na man ngonian kan ahensya an approach na climate asin market-oriented na magigin oportunidad para sa mas dakulang ganansya kan mga paraoma.
Nasa ciudad si Dar magin si Senate Committee on Agriculture chair Senator Cynthia Villar para sa selebrasyon kan 18th National Vegetable Congress.
