LEGAZPI CITY — Pinakusog pa an local government unit kan Virac sa probinsya kan Catanduanes an saindang pagpapautob nin ley kontra sa illegal parking asin kaulangan sa national highway asin mayoryang tinampo sa banwaan.
Nagpatanid si Mayor Samuel Laynes sa mga mabalgar kan municipal traffic ordinance na posible sindang mahampang sa mga penalidad.
Base kaya sa Section 46 kan Acta Republika Numero 4136 o an Land Transportation and Traffic Code, pigbabawal an pagpark kan behikulo sa highway, nasa intersection o crosswalk man, sa hampang kan pribadong driveway, sa may pakurbang parte kan tinampo asin saen man na may opisyal na senyales na pagbabawal sa pagparada.
Dugang pa ni Laynes, pighahagad kan LGU an kooperasyon kan publiko para sa matrayumpong pagpapautob kan ley.
