LEGAZPI CITY- Nagpadara na nin surat an lokal na gobierno kan Daraga sa pamayuhan kan Philippine National Railways ngani na hagadon an aksyon kaini kasunod kan serye nin mga aksidente na pigkaka imbweltuhan kan mga nagba-biyahe na tren.
Alagad segun ki Daraga Mayor Carlwyn Baldo sa intrevista kan Bombo Radyo Legazpi na hasta sa ngunyan, wara pa sindang nareresibe na kasimbagan.
Marurumduman na kan nakalihis na semana, nairehistro an pinakahuring insidente kun sain nabangga kan tren an sarong behikulo sa banwaan kan Daraga na nagresulta sa pagkagadan kan sarong persona.
Sinabi kan alkalde na kinakaipuhan na i-activate kan Philippine National Railways an saindang mga flagman sa gabos na pig-aagihan kan tren asin pakarahayon an mga roadsigns.
Dugang pa kaini na wara na man an mga roadblocks sa mga riles kan tren kaya dapat ining aksyunan.
Nilinaw man ni Baldo na bako sakop kan hurisdiksyon kan lokal na gobierno o kan mga barangay an mga riles huli ta parte ini kan mandato kan Philippine National Railways kaya dae suboot sinda nakakagibo nin aksyon.
Katunayan, maski suboot an mga lubak sa mga riles an dae sinda basta-basta nakakapagtaong aksyon huli ta pigtutuyaw ini kan pamayuhan kan ahensya.
