LEGAZPI CITY—Naka-full alert ngunyan an Legazpi City Police Station para sa mga posibleng epekto kan bagyong Ramil sa ciudad.
Segun ki Legazpi City Police Station Acting Chief of Police Police Lieutenant Colonel Domingo Tapel Jr., intrevista kan Bombo Radyo Legazpi, preparado sindang magtaong asistensya en kaso magpaotob an City Disaster Risk Reduction and Management Office nin evacuation sa mga barangay.
Pig-asigurar man niya na 24/7 na nakabantay an saindang opisina asin preparadong magserbi sa publiko.
Nagpagiromdom man an opisyal na bago pa man magrapado an bagyo an dapat na mag-ebakwar na an mga residentes huli sa katahawan kan pagbagyo an wara naman suboot nin mga rescuer na matabang sainda para na man sa saindang kaligtasan.
Abiso ni Tapel na mag-antabay sa kamugtakan kan panahon hale sa mga lehitimong abiso sa lokal na gobierno asin dapat man suboot na ma-secure an kaharongan magin an mga gamit o importanteng dokumentos nganing warang magin aberya en kaso na sinda magpasiring sa evacuation centers.
