LEGAZPI CITY – Padagos an pigsasagibong pagbabantay kan Legazpi City Police Station sa duwang border control points katakod kan pag-aalburuto kan Bulkang Mayon.
Segun ki Legazpi City Police Station Chief of Police Police Lieutenant Colonel Domingo Tapel Jr., sa intrevista kan Bombo Radyo Legazpi na nagpapa-otob nin 24/7 na pagbabantay an saindang personahes sa Barangay Mabinit asin Barangay Buyoan.
May mga itinugdok man sindang advance command post siring man an pagkokondusir nin drone surveillance nganing imonitor an sitwasyon kan Bulkan na presenteng nasa alert level 3 status asin an mga Barangay sa ciudad na nakabugtak sa 6KM permanent danger zone.
Pig-oobliga man ninda na magsurat sa saindang logbook an mga paraooma asin an saindang behikulo na malaog liwat sa danger zone kan Bulkan nganing aram ninda kun siisay an nagbibisita sa saindang omahan o atamang hayop.
Pigdoon pa kan opisyal na wara man sindang nakakahampang na kadifisilan sa presente huli ta aram man kan publiko an posibleng huma enkaso maglala pa an sitwasyon kan Bulkan.
Abiso man ni Tapel sa mga local asin foreign tourist na dae na magporbar na maglaog sa 6KM permanent danger zone nganing hilingon an lava flow kan Mayon asin hilingon na sana ini sa mga salbadong viewing zone.
