LEGAZPI CITY—Padagos an monitoring kan mga otoridad sa mga nagbabayolar sa anti-smoking and vaping ordinance sa mga pampublikong lugar sa Legazpi City.
Segun ki Legazpi Smoke Free Unit Operation Chief Jose Balbin, sa intrevista kan Bombo Radyo Legazpi, sa presente nagin minimal an saindang mga nairerehistrong nagbabalgar sa ordinansa huli sa bakasyon asin wara pang nagdadagsa na mga namamanwaan na mauli gikan sa manlaen-laeng lugar pasiring sa ciudad.
Nagmo-monitor an saindang operatiba sa mga simbahan, malls, terminal, magin sa mga pang-bangging mga establishimiento.
Afuera digdi, nagkukundusir man sinda nin aktibidades sa mga eskwelahan asin mga barangay siring kan poster making asin jingle making contest mapadapit sa paninigarilyo.
Pig-asigurar man kan opisyal na mas papahigoton pa ninda an kampanya kan nasabing ordinansa sa masunod na taon, siring man an mas papakusogon pa ini huli sa magkakaigwa pa sinda nin service vehicle, kadugangan na personahes asin body camera para sa saindang seguridad asin kan mga nagbabayolar sa ordinansa.
Mensahe man kaini na kun mawot na mag-vape o magsigarilyo an dapat na gibohon ini sa harong o pribadong lugar alagad siertohon na warang kahampang na menor de edad o senior citizen mantang piggibo ini huli sa saro ining bayolasyon sa nasambitang ordinansa sa ciudad.
