LEGAZPI CITY — Positibo an alkalde kan ciudad kan Legazpi na si Mayor Noel Rosal na magiging sarong international sports tourism center an ciudad makalihis na matrayumpong pagkokondusir kan XTERRA Off-Road Triathlon kan Domingo.
Segun ki Rosal, magibo ini nin lakdang ngani ibusol an Legazpi bilang international sports tourism center huli sa ipigkokondusir naman kan manlain-lain na sports organizers an saindang sporting events sa ciudad siring kan Mount Mayon Triathlon, national beach volleyball, dragon boat race, ibang PBA games asin an Le tour de Filipinas.
Istorya pa ni Rosal na iniladawan kan mga atleta an ciudad bilang magayon na lugar, exciting na may manlain-lain na kultura asin inapod pa bilang ‘Hot and Spicy’ destination huli sa spicy Bicol Express, Pinangat asin Chili Ice Cream.
Naging memorable asin espesyal man suboot an pagkarera sa irarom kan anino kan Mayon asin na-satisfy man sa perfect ambiance kan city boulevard asin an paros hale sa baybayon kan Albay Gulf.
Tinawang duon ni Rosal na an gabos na ginibong sporting events sa Legazpi an luminous symbol na saro an ciudad sa pinakasalbado asin exciting na lugar para sa sporting events asin kwalipikado na maging international sports tourism center.
Sinabi pa ni Rosal na ma-host an Legazpi kan Asean Cup sa maabot na Ibalong Festival sa Agosto asin pighihiling man an posibleng IRONMAN race sa masunod na taon.
