LEGAZPI CITY-Pighahanap na kan mga otoridad an sarong lalaki na naka-brief sana asin nakuwaan nin video mantang nagbabayle sa ibabaw kan sarong nagaandar na tricycle sa Iloilo City.
Basado sa impormasyon, sinabing nakuwaan nin video an lalaki kan maagahon sa Diversion Road sa parte kan Mandurriao.
Sa viral video, mahihiling na igwang sulog na helmet an lalaki na, kinondenar ni Land Transportation Office-Region 6 Director Atty. Guidioso Geduspan II, huli sa peligroso an aksiyon kaini.
Bukod sa peligro sa sadiri, naglaag man suboot an kaligtasan kan iba pang mga motorista.
Nakikipagtabangan an ahensiya sa publiko ngani maaraman an pagkakakilanlan kan lalaki asin iba pang imbuelto ngani maipaapod asin mapadarahan nin show cause order.
Kinondenar man ni Mayor Raisa Treñas an aksiyon kan nasambitang lalaki.
Sinabi man kan Mayora na pigkokondinar niya an naglalakop na video kan lalaki, huli sa naka-brief sana asin nagbabayle sa katahawan kan tinampo.
Saro suboot ining peligroso asin iresponsableng aksiyon na dapat dai ipigsasagibo sa publiko huli sa peligroso man ini sa mga motorista.
Sa presente pighahanap na an lalaki kan mga otoridad ngani mapanimbag sa saiyang aksiyon.
