LEGAZPI CITY—Arestado an sarong lalaki makalihis na pigporbar na agawon an badil kan sarong pulis na naka-deploy durante kan opening parade kan Rodeo Festival sa Barangay Pating, Masbate City, Masbate.
Segun ki Masbate City Police Station Investigator Police Captain Milanie De Guzman, sa intrevista kan Bombo Radyo Legazpi, na may sarong lalaki na naghihiling kan nasambitang parada an bigla na sanang pig-agaw an badil kan pulis na si Police Master Sergeant Mark Harry Dalanon.
Alagad huli man sa pagigin alerto ni PMSg Dalanon asin kan saiyang kaiba na saro pang pulis napugulan ninda an suspek sa pag-agaw kan saiyang armas.
Huli sa nasambitang insidente, ipinaarestar an suspek na pigbistong si alyas “Al”, 34-anyos, asin residente kan Brgy. Maanahao, Cataingan, Masbate.
Nagporbar pa suboot an suspek na magpalag durante kan saiyang pagkakaaresto kun kaya duwang kaso an ipigsunad laban digdi
.
Dugang ni De Guzman, na kan saindang pigkaistorya an suspek sinabi kaini na may mga personal siyang problema na posibleng dae na niya pigkaya na nagresulta sa pagporbar kaini na mang-agaw nin armas sa pulis.
Mientrastanto, nahahampang an suspek sa kasong Direct Assault asin Resistance and disobedience to a person in authority asin sa ngunyan nasa kustodiya na kan Masbate City Police Station para sa magkakanigong disposisyon.
