LEGAZPI CITY- Dae nagtrayumpo sa maraot na obheto an sarong lalaki makalihis na ma-aprehender kan mga nagrespondeng residente sa Brgy. Ubaliw Centro Oriental, Polangui, Albay.
Biktima sa nasabing insidente an 27-anyos na si Julie Ann Adorsa na residente kan Brgy. Ponso sa nasabing banwaan.
Sa intrevista kan Bombo Radyo Legazpi ki PC/Insp. Ed Azotea, hepe kan Polangui Municipal Police, nagluluwas sa inisyal na imbestigasyon na pigmamanehar ni Adorsa an motorsiklo na kolor violet hale sa sarong bar alagad pag-abot sa lugar harani sa sarong bangko, inulangan suboot ini kan suspek na binistong si Jordan Remogat, 29-anyos.
Huli digdi, napapundo si Adorsa rason tangarig marikas na kuhaon kan suspek an motorsiklo at marikas na pinadalagan.
Mientras tanto, nagkapirang metro pa sana an distansya kaini kan biglang matumba kun kaya makusog man na nagkurahaw nin tabang an biktima na nadangog kan mga tambay sa lugar.
Nagbalo pang magdulag an suspek alagad nilamag ini kan mga nakahiling hasta sa maarestar asin ipigturn over sa nagrespondeng kapulisan.
Sa ibong na lado, madudugangan man an kasong posibleng kahampangon kan suspek makalihis na makuhaan nin duwa pang sachet kan pigtutubudang shabu mantang ipiglalaog sa detention facility.
Nakatalaan man na isunad an mga kasong pagbayolar sa Republic Act 9165 o Comprehensive Dangerous Drugs Act of 2002, Anti-Carnapping Act asin saro pang physical injury makalihis na mandaklag pa an suspek nin gapo antes na magbalong manhabon nin motorsiklo.
