LEGAZPI CITY — Nauli sa krimen an pagka-karaoke asin pag-oogma kan sarong lalaki sa banwaan kan Bulan, Sorsogon partikular na sa Brgy. Taromata makalihis na dae magdangog sa pagpapapundo kan kataid na harong.
Binisto an biktimang si Jimmery Bitancur Arena, 47-anyos.
Susog sa inisyal na imbestigasyon kan kapulisan, nagluluwas na katahawan na kan banggi o bandang alas-11:00 mantang nagkakanta si Arena kan magduman sa harong kan suspek na nabistong si Abel Fortes asin pigpapaundo sa pagkanta huli ta nakakabulahaw na suboot sa mga pagtaraid.
Inagyat pa kaini an biktima nin suntukan kun dae mapundo sa pagkanata. Nauli pa sa argumento an pag-oolay kan duwa alagad ipinasipara sana ni Arena an pagirumdom asin nagpadagos sa pagkanta kan mahiling na nag-uli na nin harong an suspek.
Liwat na nagbalik si Fortes sa harong kan biktima asin nagkaigwa giraray nin argumento kun saen digdi na pinagbabato kan suspek an biktima mantang pinagbabadulan man nin kahoy na tuminama sa manlaen-laen na parte kan hawak kaini.
Mientras tanto, nagduman sa harong an tugang kan biktima asin digdi naman ipigbuyagyag an mga nangyari na rason kan pagsusunad nin reklamo sa pulisya kan mga ini.
Makalihis man an nagkapirang oras kan bigla na sanang magsubo an ngimot kan biktima kun saen nagibo pang maidalagan sa ospital alagad dae naman nag-abot pa nin buhay.
Sa presente, nakikipagtabangan naman an pulisya sa mga barangay officials sa pagkakaarestar kan suspek.
