LEGAZPI CITY- Pinaghahanap na ngonian kan Bacacay Municipal Police an tolong armadong lalaki na nanutok nin badil sa sarong empleyado kan bunuan sa Brgy. Baclayon sa nasabing banwaan.
Sa salaysay ni Mario Banico sa Bombo Radyo Legazpi, nagkakaturog na suboot sinda kan igwang magtuktok sa harong ninda kun kaya pinagbuksan ini.
Nakigkig na sana si Banico kan mapag-araman na armado nin mga armalite an tolong kalalakihan na ipigdescribir kaini na mga halangkaw asin darakulang tawo na nakasulot nin bonnet.
Hinapot kan mga nasabing lalaki ki Banico an mga pangaran kan pag-iribanan niya sa slaughterhouse.
Kan maaraman an pighahagad na impormasyon, pinahale na kan mga ini an biktima alagad huli sa takot na namamatean para sa seguridad kan onse-anyos na aki na kaibanan man kaini kan mangyari an insidente, nag-apod tulos si Banico sa mga pulis.
Kan mareparo ini kan mga misteryosong lalaki, marekas na nagdulag an mga ini sa dae pa maaraman na direksyon lunad kan sarong traysikel na garing pampick up nin orig o bisto sa lokal na apod na ‘tangkal.’
Sa ngonian, pig-aaram na kun siisay an mga nasabing persona asin kun ano an tuyo kan mga ini sa nasabing banwaan mientras na pig-iimbestigaran man kun igwa ining koneksyon sa serye na kan pambabadil sa Bacacay.
