LEGAZPI CITY- Pinaghahanap pa hasta sa presente kan search and rescue (SAR) team kan Philippine Coast Guard (PCG) Masbate Substation sa kadagatang sakop kan banwaan kan Monreal an sarong lalaki makalihis na maglukso sa piglulunadang barko.
Napag-araman na kasuodmang udto kan maglukso si Alfredo Guinitaran Jr., 33-anyos asin residente kan Pateros, Manila , sa barkong hale sa Pioduran sa Albay asin biyaheng Masbate.
Sa intrevista kan Bombo Radyo Legazpi ki CGS Masbate commander Chief Petty Officer Maltus Florista, kaibanan kan nasabing persona an agom na napag-aramang pasiring sa lamay kan nagadan na tugang sa nasabing island province.
Segun sa babayi, nagkapirang aldaw na suboot na pigsasabi ni Guinitaran na igwang manggagadan digdi mantang pig-iisipan naman an paghuhugot alagad wara man na ipigbubuyagyag na problema sa pamilya.
Ikinabigla man kan mismong agom an ginibo ni Guinitaran na binalo pa kutang isalbar kan mga personahe kan barko sa paagi kan pagtapok digdi nin life ring alagad imbes na magkapot, nag-dive pa sa mas hirarom na parte kan kadagatan.
Sa presente, ipagpapadagos an paghahanap sa nasabing persona mantang nakipag-coordinar naman sa mga pagtaraid na lugar siring man sa mga bangka nin mga parasira sa tulos na pagtatao nin impormasyon en kaso na mahiling an nasabing persona.
