LEGAZPI CITY—Naarestar an sarong lalaki makalihis na mahiling na may dara ining badil sa katahawan kan COMELEC election gun ban sa Barangay Poblacion, Balud, Masbate.
Minidbid an lalaki na sarong 25-anyos, warang agom asin residente kan Mobo, Masbate.
Segun ki Balud MPS COP PMAJ Hadrian San Antonio, sa intrevista kan Bombo Radyo Legazpi, na may naresibe sindang impormasyon sa telepono na kun saen sarong lalaki suboot an may dara-darang badil.
Ini saindang pigrespondehan asin pagpasiring sa lugar nahiling an lalaki na may darang badil asin nasa impluwensya nin arak kun saen tulos man ining naarestar.
Segun sa persona na nagdara siya nin badil para sa saiyang personal na proteksyon, alagad, segun sa mga otoridad na wara ining mga dokumento na nagtutugot na magdara siya nin badil.
Sa presente nasunadan nang kaso ini sa pagbalgar sa Republic Act 10591 o “Comprehensive Firearms and Ammunition Regulation Act”.
Mientrastanto, nangapudan man an opisyal sa publiko na dae na magdara nin badil lalo na kun wara man nin mga dokumento.
