LEGAZPI CITY — Klinaripikar kan Marcial O. Rañola Memorial School (MORMS) sa banwaan kan Guinobatan, Albay na bako estudyante kan eskwelahan an nagpabistong Grade 12-student na nakuwaan kan pigtutubudang shabu sa pagbisita sa Albay Provincial Jail.
Sa intrevista kan Bombo Radyo Legazpi ki Principal II Jocelyn Castelo na base sa official reference, bako man officially enrolled si Michael Manrique, 20-anyos mantang sa beripikasyon kan curriculum chair kan Grade 12, committee on discipline magin kan mga maestra, dae man nagkaklase sa MORMS an nasabing lalaki.
Dugang pang nagpasiring man sa eskwelahan an kagawad kan Barangay Travesia na sinabing bisto an joven alagad dae naman ini nagkaklase.
Aminado an principal na nakulugan sa mga nagluwas na bareta kun sain naimbwelto an eskwelahan.
Pagtataong-duon pa kan opisyal kan eskwelahan na dae man ipignigar an joven alagad wara man talaga sa official record kan MORMS.
