LEGAZPI CITY—Gadan an sarong lalaki makalihis na mauli sa sarong engkwentro an pagserbi saiya nin search warrant sa Barangay Mabiton, Claveria, Masbate.
Segun ki Claveria Municipal Police Station Chief of Police Police Captain Ma. Dolores Abenia, sa intrevista kan Bombo Radyo Legazpi, binisto an persona na sarong 46-anyos, may agom, sarong negosyante, asin residente kan Purok 3 kan nasambitang barangay.
Nangyari an pagserbi nin search warrant sa pinagsarong operatiba kan Masbate Provincial Intelligence Unit, Criminal Investigation and Detection Group (CIDG), Claveria Municipal Police Station, asin iba pang ahensya.
Segun sa mga operatiba na nauli sa sarong armed encounter mantang pigserbi sa lalaki an search warrant sa pagbalgar kaini sa Republic Act 10591 o an Comprehensive Firearms and Ammunition Regulation Act.
Nanlaban suboot an persona kaya napiritan an mga otoridad na magbalos nin pagpaputok nin badil, rason kun nata natamaan ini.
Dinara pa an persona sa ospital nganing matawan nin tulos na medikal na asistensya, alagad idineklara ining dead on arrival kan attending physician.
Dugang kan opisyal na narekober gikan saiya an .357 Magnum na badil na may apat na bala, duwang basyo, sarong metal slug.
Afuera digdi, nakumpiskar man an sarong steel magazine na may tulong bala para sa calibre .45, sarong short steel magazine para sa M16 rifle, asin duwang sling bag.
