LEGAZPI CITY — Nagpapadagos pa ngonian an ipigsasagibong ‘backtracking’ kan mga otoridad sa obhetong mabisto asin madakop an mga suspek sa pambabadil sa sarong lalaki sa hampang kan Kubo Republic restobar Brgy. Burabos, ciudad kan Sorsogon.
Pinagbabadil kan mga dae pa nabibistong persona an biktimang si Emmanuel Estremera alyas “Maning”, 51-anyos.
Sa intrevista kan Bombo Radyo Legazpi ki P/Supt. Edison Dumangas, hepe kan Sorsogon City Police, nagluluwas sa inisyal na imbestigasyon na kaibanan kan biktima an amigo kaini asin lunad kan sarong motorsiklo kan maghagad nin permiso sa kagsadiri kan restobar na mainom pa sa laog.
Sa puntong ini, duwang lalaki an pigsasabing nag-abot mantang saro sa mga ini an armado nin kalibre 45 na badil asin basta na sanang pinaputukan an biktima na nagsapar nin tama sa manlain-lain na parte kan lawas asin rason kan pagkagadan.
Casual man na naghale an mga suspek lunad kan itom na motorsiklo mantang dae man nabisto an pandok huli sa sulot na itom na jacket asin kalo kan gunman, sadit na built kan lawas sa poco mas o menos 5’8″ na langkaw.
Mientras tanto, narekober man sa pinangyarihan kan krimen an siyam na fired cartridges kan caliber .45 pistol asin sarong basyo kan bala na ipigturn-over na sa kustodiyan kan Sorsogon Provincial Crime Laboratory Office para sa ballistic asin cross-matching examination.
Dae pa man maaraman an motibo sa nasabing krimen mantang isinairarom naman an bangkay kan biktima sa autopsy examination.
Pinaghahanap naman kan mga otoridad magin an amigo kan biktima na piglalaomang makakapagtao nin lead sa nangyari.
