LEGAZPI CITY – Arestado an sarong 37-anyos na lalaki makalihis ining magkawsa nin kariribukan asin madakupan na nagdadara nin badil.
Nabisto an suspek na si Melvin Arias na residente kan Brgy Banquerohan, syudad kan Legazpi.
Segun sa impormasyon, dinulokan ninda PO2 Bryan Barugo asin PO2 Mirafuentes an sarong komosyon sa pagultanan kan suspek asin kan biktima na nabistong si Leo Esquivel kun sain naaktuhan an suspek na kapot an sarong kalibre 38 na badil.
Segun ki Esquivel, duwang beses siyang pinaputukan ni Arias alagad suwerteng dae ini nagputok.
Tulos man ining inarestar kan nagrespondeng mga pulis asin narekober an cal. 38 Armscor na kargado nin limang bala.
Nasa kustodiya ngunyan kan mga otoridad an suspek para sa tamang disposisyon.
