LEGAZPI CITY-Liwat na nag-apela an lider kan Simbahang Katoliko, na si Papa Leo XIV ngani tulos na mapundo na an nagpapadagos na gera sa Middle East.
Sa saiyang Angelus prayer sa St. Peter’s Square, pigduon kan Santo Papa na an kagadanan asin pagtios na dara kan gera sa rehiyon sarong “eskandalo para sa bilog na katawohan.”
Pig-insistir kan enot na Santo Papa gikan sa Estados Unidos, na an kinaban dai dapat magpadara sa silensyo sa mga pagsakit kan mga inosenteng biktima.
Sinabi niya na an saindang pasakit, iyo man an pasakit sa bilog na katawohan sa kinaban.
Katakod kaini, liwat na pig-enganyar ni Pope Leo an padagos na pagpamibi ngani matapos na an labanan asin makamtan an katoninongan.
Sa tahaw kan ikaapat na semana kan giera kan Estados Unidos asin Israel laban sa Iran, sinabi kan Santo Papa na padagos niyang pigbabantayan an sitwasyon na may dakulang paghadit, siring man an iba pang mga lugar na apektado kan kadahasan.
