LEGAZPI CITY- Nilinaw kan sarong grupo nin mga obrero na bako sinda kontra sa Artificial Intelligence alagad nakabantay sa kun papano ini nagagamit asin nakaka apektar sa mga manggagawa.
Ini an kasunod kan pagpirma ni Presidente Ferdinand Marcos Jr. sa Executive Order No. 131, na mabilog sa National Artificial Intelligence Council na mamamayo sa pagpapaotob kan mga polisiya asin programa para sa responsable asin salbado na paggamit kan AI.
Segun ki Bukluran ng Manggagawang Pilipino Chairman Leody De Guzman sa intrevista kan Bombo Radyo Legazpi na wara sindang pagkontra sa AI huli ta saro ining development na nagpaparikas sa mga bagay asin nagpapagaan sa trabaho.
Alagad nilinaw kan opisyal na an problema kun gagamiton ini para sa interes kan mga darakulang negosyante o imperyalista na magreresulta sa pagkahali sa trabaho kan dakol na mga namamanwaan.
Partikular na tinukoy man kaini an interest kan darakulang mga nacion na magreresulta suboot sa kawaran nin hanapbuhay kan ibang mga obrero.
Katakod kaini, sinabi ni De Guzman na dapat laoman kan mga obrero asin namamanwaan na kun maging operational an Artificial Intelligence, magreresulta ini sa unemployement kan milyun-milyon na mga obrero huli ta mapaparikas na an trabaho asin dae na kaipuhan an dakol na mga obrero sa nagkapirang sektor.











