LEGAZPI CITY—-Maabot sa P81,600 na kantidad nin pinagtutubudang shabu an nakumpiskar sa tulong suspetsado sa kinundusir na buy-bust operation kan pinagsarong pwersa kan Philippine Drug Enforcement Agency Sorsogon, Matnog MPS asin iba pa sa banwaan kan Matnog sa Sorsogon.
Segun ki Sorsogon PPO PIO PMAJ Arwin Destacamento, sa intrevista kan Bombo Radyo Legazpi, an mga suspetsado may edad nin nasa 21-anyos, 25-anyos, asin 35-anyos asin pararehong residentes kan Bulan, Sorsogon.
An mga suspetsado kairiba sa listahan na pigkokonsiderar bilang high-value target personality; nakumpiskar digdi an anom na pakete nin pinagtutubudang shabu.
Sa presente nasa kustodiya na kan Philippine Drug Enforcement Agency Sorsogon na an mga suspetsado asin mahahampang sa kasong pagbalgar sa Republic Act 9165 o Comprehensive Dangerous Drugs Act of 2002.
Mientrastanto, pangapudan man kan opisyal sa publiko na makipagtabangan sa kapulisan na en kaso man na may siring na personahes sa saindang mga lugar na tulos ining i-report sa mga otoridad nganing mapuho na an ilegal na aktibidades na nakakaraot nin buhay kan sarong indibidwal.
