LEGAZPI CITY-Piglalaoman kan New NAIA Infra Corp. (NNIC) na maabot sa labi 1.35 milyong pasahero an mabiyahe sa Ninoy Aquino International Airport sa panahon kan Holy Week poon Marso 28 hasta Abril 5.
Basado sa projection kan aeropuerto maabot sa 1,353,265 an kabilugang pasahero sa laog nin siyam na aldaw, bahagyang mas halangkaw ini kumpara sa 1,326,730 na nairehistro kan nakaaging Semana Santa 2025.
Siring man sinabi kan NNIC na mas hababa ini sa naenot nang pinaglalaoman huli sa suspensyon kan nagkapirang mga flights asin limitasyon sa operasyon sa Middle East routes.
Katakod kaini, nagpapaotob sinda nin manlain-lain na lakdang kaiba an pagdagdag kan personnel sa check-in counters, immigration asin security areas, mas mahigot na koordinasyon sa airlines asin ground handlers, pagpapahalawig kan oras kan passenger assistance desks, asin real-time monitoring sa mga terminals.
Pinayuhan man kan NNIC an publiko na busisihon an flight advisories, maglatag nindagdag na oras sa biyahe, asin mag-abot nin amay sa aeropuerto.
Pigpapagirumduman ninda an mga international passengers na kumpletuhon an saindang eTravel registration bago magduman sa airport ngani maibitaran an delay.
