LEGAZPI CITY—Labi sa P1.5 milyong kantidad nin droga an nakumpiskar sa pigkokonsiderar na High Value Individual sa Barangay Pating, Masbate City.
Segun ki Masbate Police Provincial Office Public Information Officer Police Captain Estrella Torres, sa intrevista kan Bombo Radyo Legazpi, binisto an suspek na si alyas “Alex”, 40-anyos, taga-ayos nin mga raot na gamit, asin residente kan nasambitang lugar.
Nakumpiskar sa suspek an pocomas o menos 222 gramos nin pigtutubudang shabu o katumpad nin labi sa P1,509,600 na street market value.
Naarestar ini sa pinagsarong operatiba kan Masbate City Police Station (Lead Unit), kaiba an Masbate PPO Provincial Intelligence Unit Provincial Police Drug Enforcement Unit, Masbate Maritime Police Station, sa pakikipagkoordinar sa Philippine Drug Enforcement Agency Regional Office 5.
Sa presente nasa kustodiya kan Masbate City Police Station an suspek para sa magkakanigong disposisyon asin mahahampang sa kasong pagbalgar sa RA 9165 Comprehensive Dangerous Drugs Act of 2002.
Mientrastanto, padagos an pangapudan kan saindang opisina sa publiko na makisumaro sa paglaban kontra sa ilegal na droga sa paagi kan pagtao nin impormasyon na makakatabang sa pag-arestar sa mga drug personality sa saindang lugar.
