Maabot na sa 10 milyon na katawo an napiritan na mag-ibakwar hali sa saindang mga harong sa Sudan huli sa nagpapadagos na gera.
Segun sa International Organization for Migration kan United Nations, magpuon kan Abril kan nakalihis na taon sunod-sunod na an mga residentes na naghali sa saindang residencia ngani na makadulag sa nagpapadagos na bakbakan kan mga suldado kan gobyerno asin kan Rapid Support Forces.
Kadaklan kaini an hali sa kapitolyo kan Khartoum kung sain nangyayari an pinakamatinding bakbakan.
Nasa duwang milyon kan mga residentes na nagdulag papaluwas kan nasyun asin nagdadagos ngunyan sa Chad, South Sudan asin Egypt.
Nahahandal an United Nations na kung magpapadagos pa an siring kaining sitwasyon posibleng magkaigwa nin mahiwasan na pagkapunaw sa Sudan asin maparalisa na an ekonomiya.
Magigirumduman na taong 2019 pa kan huring magkaigwa nin presidente an Sudan kan patalsikon sa pwesto si Omar Hassan Ahmad al-Bashir sa paagi nin coup d etat.
Makalihis ini kinontrol na kan suldado asin Rapid Support Forces an gobyerno, hasta sa sinda naman an mag-agawan sa pwesto na nauli na ngunyan sa mahiwasan na gera.
