LEGAZPI CITY – Nag-usad na an “Lab Move” mobile laboratory kan Department of Science and Technology (DOST) Bicol nganing maghatod nin tabang sa manlain-laing parte kan rehiyon na magtest kun malinig an inumong tubig.
Segun ki DOST Bicol Regional Director Rommel Serrano sa intrevista kan Bombo Radyo Legazpi na idinara ninda an Lab Move sa sarong special Science Caravan sa provincia kan Sorsogon nganing enganyaron an mga estudyante na i-explore an Scientific Career.
Pira sa saindang ipig-ofresir na nagigibo kan saindang proyekto iyo an demonstration kan mga test arug kan chemical, asin microbiological analysis of potable water sample.
Pagsyerto niya pa na may mga masunod pang mga lugar na bibisitahon an mobile laboratory mantang pighahalat an clearance gikan sa Department of Health, Department of Environment and Natural Resources asin Environmental Management Bureau.
Paliwanag kan opisyal na obheto kan saindang paglibot sa mga eskwelahan iyo an nganing mahiling kan mga estudyante an pag-uswag kan Science and Technology asin dae na kinakaipuhan na magpasiring sa mga unibersidad asin mga office laboratories.
Pigkokonsidera man ni Serrano na matrayumpo an paglalansar ninda kan proyekto sa mga eskwelahan huli ta mantang naghahalat kan mga permit an dakol nang nakinabang asin na-impormaran na mga namamanwaan afuera sa water testing services.
