LEGAZPI CITY- Pigkukwestiyon sa ngunyan kan lokal na gobyerno kan Malinao an basta na sanang pamumutol nin suplay nin kuryente kan Albay Power and Energy Corporation (APEC) na wara nin bastanteng konsultasyon asin abiso.
Biyernes nin banggi kan maputolan na nin kuryente an Barangay Bariw asin Jonop na igwa suboot nin P1.4 milyon asin P1.3 milyon na dae pa nababayadang bill.
Sa intrevista kan Bombo Radyo Legazpi kay Municipal Councilor Alex Camu, nagbilog na nin resolusyon an lokal na gobyerno na nangangapudan sa APEC na pundohon asin ikonsidera an sitwasyong ngunyan na may pandemya antes na magpaotob nin disconnection.
Tinuyaw kan opisyal an basta na sanang pagputol kan suplay nin kuryente sa nasabing mga barangay na dae man nakikipagkoordinar sa mga residentes asin kapitan mantang nag-abiso sana sa saindang alkalde.
Tinawang duon pa ni Camu na kadaklan man sa saindang mga residentes an responsableng nagbabayad nin bill asin may mga resibo pa kung kaya kwestiyonable kung papanong nag-abot sa milyon an bill kan mga barangay.
Problema naman suboot kan APEC kung dae sinda nakakasingil sa kuryente kung kaya dae na dapat na idamay sa pagputol nin suplay an mga residenteng nakakabayad man nin tultol sa saindang konsumo.
Plano ngunyan kan lokal na gobyerno na makipagdayalogo sa APEC asin ipaabot an saindang mga reklamo lalo pang nasa walong barangay pa suboot an igwa nin milyon man na mga bill.
