LEGAZPI CITY — Pigmamawot ngunyan kan mga lehislador na madugangan pa an benipisyo na mareresibe kan mga senior citizens sa bilog na nasyon.
Segun ki Ako Bicol Partylist Representative Rodel Batocabe, sa irarom kan Universal Social Pension, nakakaresibe an mga ini nin P500 kada bulan ngani na makatabang sa saindang pangangaipo.
Alagad pigbubusol suboot kan kongreso na langkawan ini nin hasta sa P1,000 asin halion na an distinction kun sain makakaresibe kaini an mga may edad nang warang pension sa GSIS asin SSS asin an mga may pension na nasa P3,500 kada bulan.
Pagbuyagyag pa ni Batocabe na maabot sa P40 billion an alokasyon digdi asin kumpiyansa siya na may bastanteng kwarta an gobyerno para sa nasambit na programa.
Dugang pa ni Batocabe na an mayayaman na an dae na man kaipuhan na magin benipisyaryo kan social pension huli ta dapat na ipaubaya asin itao na sana an tabang sa mga talagang warang mapagkukuwaan.
Mientrastanto, nagtutubod an kongresista na dapat sanang mapakinabangan kan mga namamanwa an kwarta kan gobyerno huli ta nagdadakula man an buwis na pighahagad sa mga namamanwa.
