LEGAZPI CITY – Nanindugan an sarong kongresista na bilang na an mga aldaw kan mga smugglers asin hoarders sa nasyon.
Kasunod ini kan paparaning State of the Nation Address ni Presidente Ferdinand Marcos Jr. kun saen mawot kaini na madangog an dapit sa pagsasabatas kan Anti-Agricultural Economic Sabotage Act.
Segun kay Pork Producers Federation of the Philippines Chairperson Congressman Nicanor Briones sa intrevista kan Bombo Radyo Legazpi na pig-aabangan kan mga paraoma na mapirmahan na an nasambitang propuesto antes an ikatulong SONA kan Presidente.
Dugang pa kaini, naaprubaran na an propuesto asin natapos na an bicameral kaini alagad pirma na sana ni Marcos an pighahalat ngane na pormal na ining maimplemintar.
Mientrastanto, nagpadara naman sinda nin kasuratan ki Marcos sa kamawotan na madangog an apelar kan mga paraoma asin maisabay na sa saiyang State of the Nation Address.
Sa paagi kaini, naglalaom an opisyal na mababawasan na an mga smugglers asin hoarders.
May penalidad man ini nin pagkakakulong mantang matao man suboot nin reward sa mga mawot na magbuyagyag kan mga smugglers.
Segun pa sa opisyal , personal siyang maatendir sa ikatulong SONA kan Presidente sa maabot na Lunes, Hulyo 22.
