LEGAZPI CITY- Nakukulangan an Kamara sa paliwanag kan Department of Health (DOH) sa primerong aldaw kan pagdangog sa nadiskobreng P67.3 bilyon na unobligated funds kan ahensya.
Sa nasabing pagdangog, presente si mismong COA Chairperson Michael Aguinaldo, Health Francisco Duque III asin iba pang mga opisyal kan DOH.
Sa intrevista kan Bombo Radyo Legazpi kay Gabriela Women’s Partylist Rep. Arlene Brosas, tinutokan muna sa hearing an nasa P24 bilyon na unspended o dae nagamit na pondo kan ahensya, dae pa kasabay an budget na may mga nawawara asin kwestiyonableng dokumentos.
Dae man suboot naipapaliwanag ni Duque asin mga opisyal kan DOH kung nata dae nagamit an P24 bilyon na pondo na obligated na o may igwa na nin dapat na padumanan partikular na an kampanya kan gobyerno kontra sa COVID 19.
Nagpahayag man nin pagkadismaya an kongresista sa gross negligence na nagibo kan mga opisyal kan ahensya lalo pang panahon nin pandemya ngunyan asin dakol na mga Filipino an nangangaipo kan pondo.
Bako suboot kaako-ako an rason kan DOH na napapagal na an sinda dara kan labi sa sarong taon ng nasa pandemya an Pilipinas kung kaya nagkaigwa nin mga kakulangan.
Tinawang duon ni Brosas na kung dae kaya kan mga opisyal kan DOH an trabaho, mas maray pa sanang maghali na sa pwesto asin itao an posisyon sa mas may kapabilidad na indibidwal.
