Iimbestigaran kan House Committee on Justice, na pinangenotan ni Batangas 2nd District Rep. Gerville Luistro, an kahagadan kan Estados Unidos sa extradition ni Pastor Apollo Quiboloy nganing malinawan an mga isyu sa proseso.
An pagkondukta kan motu proprio investigation an nagluwas makalihis an kahagadan ni Akbayan Party-list Rep. Perci Cendaña, na nangapodan sa komite ni Luistro na magsagibo nin inquiry in aid of legislation manungod sa extradition request kay Quiboloy.
An pormal na mosyon na ipadagos an imbestigasyon isinangat ni Committee Vice Chairman, Bukidnon 2nd District Rep. Jonathan Keith Flores.
Inaprobaran ni Luistro an mosyon makalihis na warang magtutol sa mga miembros.
Alagad antes kaini, nagkaigwa nguna nin mahiwas na diskusyon an mga mambabatas sa pangangaipuhan kan imbestigasyon.
Sinabi niya na an duwang importanteng ley na dapat pag-olayan iyo an 1994 extradition treaty sa pagultangan kan US asin Pilipinas asin an Presidential Decree 1069 o an Philippine Extradition Law na naisa-ley kan 1977.
Segun saiya, an duwang ley an “silent” sa nagkapirang importanteng detalye.
Tinawan duon man ni Flores na bako malinaw an presenteng mga ley kun sisay an may autoridad na magpili sa temporaryong pagsuko asin deferred surrender kan mga extradited, bagay na inako man ni Luistro.
Piglinaw man ni Luistro na insidental sana an pagkaimbwelto kan Kingdom of Jesus Christ (KOJC) church founder na si Quiboloy sa imbestigasyon.
Sinabi ni Luistro na an saiyang komite maghihingoa na pakusugon an balangkas nin extradition kan nasyon, masyerto an accountability, asin pakusugon an promesa kan administrasyon sa pakikipagtabangan kan Pilipinas sa ibang nasyon laban sa mga seryosong krimen, mantang pigrerespeto an independensya kan mga korte.
