LEGAZPI CITY – Ikinabigla ni House committee on Justice vice-chairman asin AKB Rep. Alfredo Garbin Jr. kun papanong nakasabay si dating Calauan, Laguna Mayor Antonio Sanchez sa listahan kan mga posibleng mapalibre nin amay.
Magigirumduman na kasabay si Sanchez sa pigsasabing labi sa 10, 000 na convicted prisoners na may oportunidad na makalibre huli sa ipinahiling na magayon na pag-uugali mantang nagsisirbe sa sentensya.
Sa intrevista kan Bombo Radyo Legazpi, tinawang-duon ni Garbin na kaipuhan na maaraman kun papano an nagin computation para ki Sanchez sa good conduct time allowance na nasa irarom kan Republic Act 10592.
Ini man an mayor na obheto sa isinumiter na resolusyon tangarig na maimbestigaran an isyu asin mahiling an iba pang nasa lista na kwestiyonable man.
Susog kaya suboot sa records, naimbwelto pa ini sa drugs smuggling asin paglalaog nin kontrabando mantang nasa karsel.
Afuera kaini, dapat man suboot mahiling kun kwalipikado ini sa pagkabali sa listahan urog pang konsideradong heinous crimes an krimen na rape asin murder sa mga estudyante kan University of the Philippines Los Baños na sinda Eileen Sarmenta asin Allan Gomez kan 1993.
