LEGAZPI CITY-Agaw-atensyon an isinagibong Jeepney painting competition na parte kan nagpapadagos na selebrasyon kan Kasanggayahan Festival sa provincia kan Sorsogon na nagserbing atraksyon sa mga turista.
Sa intrevista kan Bombo Radyo Legazpi sa organizer kan event na si Vianca Domdom, naghaloy suboot nin nasa tulong aldaw an aktibidad na pinartisiparan nin 12 teams na compuesto nin tig-tolong mga artist asin drayber kan jeep.
Nangenot sa kompetisyon an representante na hale sa Irosin na makakaresibe nin P30,000 na cash prize, second place an Castilla sa P25,000 asin third place an Magallanes na may P15,000.
Afuera digdi, makakaresibe man an gabos na team nin tig-P2,500 bilang consolation prize mantang binayadan naman kan lokal na gobyerno an tulong aldaw na pasada kan mga drayber na ginamit an jeep sa aktibidad.
Obheto kan nasabing kompetisyon na maibalik an makolor asin magayon na itsura kan mga jeep na parte na kan historya kan nasyon.
Nakatalaan man na isabay an mangganang pinintahan na jeep sa isasagibong parada sa Kasanggayahan sa maabot na Oktubre 17.
