Inanunsyo na kan Israel an pagpapaotob nin 11 oras na ceasefire kada aldaw sa Gaza bilang pagsunod sa ipinaluwas na resolusyon kan United Nations para sa pagpapapundo na kan gera.
Segun sa Israeli military, tuyong alas 8 nin aga hasta alas 7 nin pagkabanggi, pupundohon kan saindang militar an pag-atake asin pagsasagibo nin anuman na operasyon sa tinampo kan Kerem Shalom sa Salah al-Din.
Digdi pwede ng makaagi an mga truck na magdadara nin pagkaon, inomon, bado asin iba pang mga ayuda na kaipohan kan mga sibilyang Palestinians.
Alagad pag-abot nin banggi, posibleng maglunsar na naman nin ground assault asin airstrikes an Israel sa lugar kung kaya kaipohan na nakahali na an mga nagpapadara nin ayuda.
Ini na an kaenot-enoting bes na nagtugot an Israel na mabuksan an border para sa pagpapadara kan ayuda.
Alagad sa ibong kan anunsyo na ini, mahigot man giraray an naging huma ni Israeli Prime Minister Benjamin Netanyahu na magpapadagos pa an gera sa Gaza hasta sa dae pa nauubos an mga militanteng Hamas asin napapalaya an gabos na mga hostages.
