LEGAZPI CITY – Ipigkundusir kan Land Transportation Office Bicol an Intensified distribution kan plate numbers kan mga behikulo sa enterong rehiyon.
Segun ki Land Transportation Office Bicol spokesperson Jaime Roperes sa intrevista kan Bombo Radyo Legazpi na katakod kaini an nagsagibo man sinda nin oplan plaka check para sa mga plaka na nairehistro kan taong 2017 asin pababa na dae pa nakukuwa kan mga kagsadiri.
Target nindang maibarewas an maabot sa labi 200,000 na mga plate number sa enterong rehiyon asin uminabot na sa 17,000 an mga plaka na matrayumpong naitao na sa mga may kagsadiri.
Paglilinaw niya man na an mga plakang ipigbabarewas ninda an para sa mga behikulo na nabakal sa bicol region alagad pwedesir man i-track kan mga nakabakal sa luwas kan rehiyon an status kan saindang plaka sa paagi kan LTO Tracker system.
Pigtaram pa kan opisyal na kaipuhan sana magdara kan ma-claim kan saindang mga plaka nin valid id asin Official Receipt (OR) and Certificate of Registration (CR) kan saindong mga behikulo asin authorization letter kun bako an kagsadiri an ma-claim.
Pagirumdom niya sa publiko na mag-agi sana sa pedestrian lane mantang permihang darahon an lisensya, OR/CR kan motor asin magsulot nin helmet para man sa mga nagmamaneho nin motorsiklo.
Pangapodan ni Roperes sa mga naghaharalat kan saindang plaka na antabayanan an saindang official social media pages nganing maaraman an schedule kan saindang plate distribution.
