Salbadong nakabalyo an sarong Indian-flagged tanker na may darang liquefied petroleum gas (LPG) sa Strait of Hormuz, segun sa gobyerno kan India kan Sabado, Abril 4, 2026.
An tanker na Green Sanvi an may karga na poco mas o menos 46,650 metriko tonelada nin LPG asin may lunad na 25 seafarers kan magbalyo sa nasambitan ng ruta.
An Strait of Hormuz an sarong importanteng agihan para sa pankinaban na suplay nin langis asin gas, alagad naapektaran an dalagan kan maritime traffic makalihis an mga air strike kan Estados Unidos asin Israel laban sa Iran.
Sa ibong kaini, sinabi kan gobyerno kan India na nasyerto ninda an ligtas na pag-agi para sa nagkapirang mga Indian-flagged vessels sa laog kan nakaaging tulong semana.
Susog sa shipping ministry, 17 Indian-flagged ships na may 460 Indian seafarers an nagtetenir sa western Persian Gulf region.
Basado sa sarong local radio sa India, an Green Sanvi iyo an ikapitong LPG tanker pasiring sa India na nakabalyo sa Strait of Hormuz poon kan magpoon an gera sa Middle East.
Nag-aangkat an India nin haros 60 porsyento kan suplay kan LPG, asin nahahampang sa kakulangan nin gas sa nakaaging bulan huli sa mga pagka-octaba sa importasyon.
Huli kaini, nag-implementar an gobyerno nin mas mahigot na kontrol sa distribusyon kan natural asin cooking gas, na pigtatawan nin prayoridad an mga harong asin piglilimitahan an suplay para sa industrial use.
Sa ibong kan tensyon, nagmantinir an India kan saindang relasyon sa Iran, mantang padagos man na pigpapahiwas an saindang kooperasyon sa Israel.
 has safely crossed the Strait of Hormuz, according to the Indian government on Saturday, April 4, 2026.){kind=link}