LEGAZPI CITY – Nagtutubod an sarong political analyst na dapat bantayan kan mga namamanwaan an pag-usad kan impeachment trial ni Vice President Sara Duterte.
Segun ki Atty. Michael Henry Yusingco sa intrevista kan Bombo Radyo Legazpi na dapat ining bantayan kan mga namamanwaan huli ta malinaw an kasuguan kan saligang batas na magsagibo nin paglilitis an impeachment court.
Nagigin problema subopot an pagkakaigwa nin paghiro sa mismong laog kan senado nganing kontrahon an konstitusyon sa paagi kan pagbabasura kan impeachment complaint.
Punto niya man na dapat malawos an trial sagkod sa 20th congress hasta sa mapagdesisyunan kan senate impeachment court kun may pagkakasala o wara an Bise Presidente.
Abo man kan nasabing political analyst na mag-abot an panahon na an mismong mga senado na an kusang magtanggi na sunudon an ipigsusugo kan saligang batas huli ta dakula an epekto kan saindang paglalapastangan sa namamanwaan asin sa nacion.
Kadaklan man sa mga senador ngonian an nagpaplano na para sa saindang posisyon sa 2028 election kun kaya kaipuhan ninda an mga duterte nganing mapakusog an saindang impluwensya sa mga botante.
Tinuyaw niya man an piggigibong delayed kan mga senator judge sa pagsasagibo nin trial huli ta nakapreparar na an lado kan impeach official asin an mga house prosecutors kun kaya mabantol an usad kaini ngonian.
Pagdoon man ni Atty. Yusingco na makakatabang man an eksperyensya kan mga beteranong senators sa pag-abot sa impeachment na malaog ngonian sa 20th congress huli ta aram na ninda an dapat gibuhon mapadapit sa trial ni VP Sara Duterte.
