LEGAZPI CITY- Pig-aantabayanan kan sarong Political Science Professor an pagkakabuyagyag kan mas darakula pang pangaran sa nagpapadagos na imbestigasyon sa anomalya sa flood control projects.
Segun ki University of Sto. Tomas Manila Department of Political Science Professor Paul Micah Francisco sa intrevista kan Bombo Radyo Legazpi na afuera sa nagkapirang mga kongresista asin senador, duda sinda na igwang mga local government unit officials man an imbwelto sa kickback sa mga proyekto sa saindang nasasakupan na lugar.
Sa presente kaya solamenteng an Independent Commission for Infrastructure na sana an nag-iimbestigar sa isyu huli ta sa Nobyembre pa pinaglalaoman na magpapadagos an imbestigasyon kan Senado.
Aminado man ini na igwang mga konsikwensya an pag-live stream kan ICI sa saindang imbestigasyon huli ta posible an trial by publicity.
Alagad sa paagi kan live streaming, mas magigin transparent sa impormasyon asin maaaraman kan publiko an dalagan kan imbestigasyon.
Mientras tanto, aminado si Professor Francisco na igwang mga pagdududa kun talagang magigin malinig sa impluwensya kan politika an imbestigasyon.
Alagad hagad kaini an impartial asin patas na pag-aram sa katotoohan kun siisay an mga dapat mapanimbag na mga personalidad na imbwelto sa korapsyon.
