LEGAZPI CITY—Naapektaran suboot kan imbestigasyon kan mga anomalya sa flood control projects an nairehistrong pinakahibabang satisfaction rating ni Presidente Ferdinand Marcos Jr. puon kan saiyang pagtukaw sa pwesto.
Ini kun saen basado sa survey kan public opinion research firm na WR Numero na nag-abot an saiyang satisfaction rating na 21%—an pinakahibaba na huring nahiling suboot kan panahon ni dating Presidente Gloria Macapagal-Arroyo.
Segun ki Far Eastern University Political Analyst/ Faculty, Prof. Amr Solon Sison, sa intrevista kan Bombo Radyo Legazpi, nahiling suboot kan mga Pilipino kun pano dae namamanehar nin maayos kan Presidente an mga nasabing isyu o problema siring kan pagdesignar kaini ki Jesus Crispin “Boying” Remulla bilang Ombudsman na saro suboot niyang kaalyado, asin an mga akusasyong itinapok saiya kan dating kongresista na si Zaldy Co.
Posible man suboot na naapektaran an rating huli sa mga kritisismo gikan sa saiyang tugang na si Senator Imee Marcos mapadapit sa akusasyon kaini sa “illicit choices” sa buhay ni Presidente Marcos.
Dugang pa kan opisyal na nakaapektar man suboot digdi an sagkod sa ngonian an wara pang nangyayari sa mga pigsasagibong imbestigasyon sa flood control scam asin iba pang nagruluwasan na isyu siring kan Department of Health asin iba pang ahensya kan gobyerno.
