LEGAZPI CITY – Pigseselebrar ngunyan na aldaw an ika-109 na anibersaryo kan International Women’s Day sa bilog na kinaban.
Katakod kaini, nag-martsa an Gabriela Bicol puon sa BRTHH pasiring sa Penaranda park sa pagkomemorar kan nasambitan na aldaw kan mga kababaihan.
Sigon ki Jen Nagrampa, tagapagtaram kan Gabriela Bicol, padagos man giraray an saindang pagbusol sa reporma sa trabaho, daga, hustisya asin katoninongan.
Ipighayag kaini na dae pa nagigibo kan presenteng administrasyon an pagtapos sa kontraktwalisasyon maski pa ini an saro sa mga mayor na plataporma ni Presidente Rodrigo Duterte.
Padagos man suboot an mga kadahasan kontra sa mga kababaihan arog kan panlulugos.
Dugang pa ni Nagrampa, kan taon pang 2013 pigbabansagan an probinsya kan Albay bilang Rape Capital of the Philippines.
Sa katunayan, kan Enero sagkod Agosto 2016, sinabi ni Nagrampa na nakapagrehistro sa bilog na rehiyong Bicol nin 108 na kaso nin panlulugos.
Kasabay kaini, pangapodan ni Nagrampa sa mga pulitiko sa Bicol na magsagibo nin kongkretong aksyon.
Dae man kaya suboot nabawasan an siring na mga kaso maski pa nagkaigwa nin Oplan Tokhang an PNP katakod kan war on drugs kan gobyerno.
