LEGAZPI CITY-Nagpaluwas an Registry of the International Criminal Court (ICC) nin bagong guidelines para sa maabot na paglilitis kay dating Presidente Rodrigo Duterte na nahahampang sa kasong crimes against humanity na igwang koneksyon sa saiyang kampanya kontra iligal na droga.
Kaiba sa mga rekomendasyon kan ICC Registry an paghagad sa mga partido asin partisipante sa kaso na malinaw na bistuhon an mga parte kan transcript na mawot nindang ipa-redact o itago sa publiko.
Suhestyon kan registry na gamiton an proseso kan pag-verify kan transcript na ginamit sa kaso ni Mahamat Said Abdel Kani ngani masierto an accuracy kan opisyal na rekord kan paglilitis.
Afuera digdi, pig-enganyar man kan registry an Trial Chamber III asin an mga partisipante sa kaso na gamiton an witness-entity asin evidentiary-materials o E-binders modules sa Judicial Workflow Platform.
Susog sa registry, makakatabang ini ngani magtenir na organisado asin nasa sarong komprehensibong sistema an gabos na rekord kan kaso.
Magigirumduman na durante kan enot na status conference kan Mayo 27, sinabi kan Trial Chamber III Presiding Judge na si Joanna Korner na an korte magsasagibo nin bagong health assessment kay dating presidente Duterte ngani maaraman kun siya igwang kakayahan na maghampang sa paglilitis.
Nakatakdang poonan an paglilitis kay Duterte sa Nobyembre 30, 2026.
Magkakaigwa man nin duwa pang status conference an ICC sa Hunyo 23 asin Hulyo 14 bilang parte kan preparasyon para sa maabot na trial.
