LEGAZPI CITY – Pinahimutikan kan AKO-Bicol party-list an dapit sa huruding-huding na magkakaigwa nin kudeta kontra ki House Speaker Pantaleon Alvarez.
Segun ki AKB Rep. Rodel Batocabe, an presidente kan party-list coalition, wara man suboot sindang piglulutong siring na lakdang.
Sinabi pa kaini na matibay, sararo asin disiplinado an supermajority bloc kan Kamara asin solido ini.
Nagpuon an huruding-huding kan kudeta huli sa kontrobersyal na mga pahayag ni Alvarez dapit sa pagbabalik kan death penalty bill.
Kan Miyerkules, inanunsyar ni Alvarez na sasalidahan kaini an mga deputy speakers na makontra sa death penalty restoration bill na pigladawan kaining prayoridad na lakdang kan administrasyon.
Mientrastanto, pigsuhestyon man ni Batocabe an pagkakaigwa nin peace talks sa regional level kun saen problema man an insurhensya kan mga komunista.
Naglalaom suboot an kongresista na na maipapadagos an peace talks kun bako sa national level, maski sa rehiyong Bicol sana.
Kumpyansa man si Batocabe na an militar asin New People’s Army (NPA) partikular na sa Bicol an makakaresa na useless kun gadanon ninda an lambang saro huli sa maresulta sana ini sa mas haloy na kamunduan asin kadifisilan sa mga konstituentes.
